ہماری  جان ہے اردو
ہماری شان ہے اردو
غموں کی بھیگی پلکوں سے لبوں کی مسکراہٹ تک
کسی گہری خموشی سے کسی کی شوخ آہٹ تک
محبّت کے  فسانے  کا  حسین عنوان ہے اردو

دکن کی شہزادی ہے یہی دلّی کی رانی ہے
عظیم آباد کی ملکہ اودھ کی یہ نشانی ہے
معزز صوفیوں کے گھر کا ایک گلدان ہے اردو

قطب شاہ میر غالب نے اسے نازوں سے پالا ہے
نکھارا درد نے اقبال نے اسکو سنوارا ہے
یہی طبلے  کی جاں ہے بانسری کی تان ہے اردو

صداقت کا لبادہ اوڑھ کر رہتی عدالت میں
محبّت کی صدا بن کر اترتی ہے  سماعت میں
ہے سچچائی یہی کہ فخر ہندوستان ہے اردو

بہار اپنا یقیناً جان اردو شان اردو ہے
یہاں  کے خطّے خطّے بسی اس کی ہی خوشبو ہے
کہ راسخ اور جمیل و شاد کی پہچان ہے اردو

کلیم عاجز شمیم شبنم و سلطاں پھول ہیں اس کے
ظفر خورشید اور  قاسم کے ہرسو رنگ ہیں بکھرے
اے چشتی مختصر یہ کی ہماری آن ہے اردو