وہ شخص پھرمیرے رو برو تھا، میں  قطرہ قطرہ پگھل رہا تھا
*عجیب وحشت سی چار سو تھی عجیب چشمہ ابل رہا تھا*

*رفاقتوں کی تمام خوشیاں اداس راہوں پہ گامزن تھیں*
*ہوا سرہانے سسک تھی، چراغ کا دم نکل رہا تھا*

*یہ دیکھو پھر آج کوہِ جاں میں ہزار چشمے ابل رہے ہیں*
سنا ہے کل رات اپنے بستر پہ کوئی کروٹ بدل رہا تھا

وہ میری پلکوں کا اک مسافر جو دامنِ مہرباں تک آیا
*وہ ایک قصہ جو دل کے گوشے میں ایک عرصہ سے پل رہا تھا*

کسی کی زلفوں کی قید سے جب مری وفا نے رہائی پائ
*سو یوں ہوا پھر حصار جاں سے بھی کچھ دھواں سا نکل رہا تھا*
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
میرے دل کی بستی میں جیون سے ہارے لوگ
روتے روتے سو جاتے ہیں درد کے مارے لوگ

قسمت بھی کیا چیز ہے مجھ کو آج ہوا احساس
کچی سڑک پر دوڑ رہے ہیں چاند سے پیارے لوگ

برسوں سے سونا سونا ہے گھر آنگن دہلیز
آتے اور گزر جاتے ہیں یہ بنجارے لوگ

*اُس بستی میں کیوں جاؤں اب کون وہاں ہے میرا*
میرے لئے تو مر ہی گئے سارے کے سارے لوگ

خواب نگر میں خاموشی ہے صدیوں سے اے دوست
کس سے اپنا حال کہیں گے یہ بےچارے لوگ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
*کہاں یہ تم نے سوچا تھا بچھڑنے سے ذرا پہلے*
میں قطرہ تھا یا دریا تھا بچھڑنے سے ذرا پہلے

نہ جانے کیوں زمانے بعد مجھ کو یاد آیا ہے
میں اک روشن ستارہ تھا بچھڑنے سے ذرا پہلے

پھر اس کے بعد آنکھوں میں کبھی آنسو نہیں آئے
بہت تم نے رلایا تھا بچھڑنے سے ذرا پہلے

کسی کو کیا خبر میں کیوں تھکا ماندہ سا رہتا ہوں
میں شیشہ جیسے ٹوٹا تھا بچھڑنے سے ذرا پہلے

محبت کی کہانی میں کئی کردار ایسے تھے
جنھیں میں جاں سے پیارا تھا بچھڑنے سے ذرا پہلے
 ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

محبت رسم کی دہلیز پر سر پھوڑتی ہوگی
دعا چپ چاپ اک کھڑکی سے ہم کو دیکھتی ہوگی

کبھی فرصت ملے تو اپنے دل سے پوچھ لینا تم
تمھارے بعد میری زندگی کیا زندگی ہوگی

دیار غیر میں گونجیں گے پھر نغمے بہاروں کے
*مرے آنگن میں تنہائی مری گم سم کھڑی ہوگی*

میں اپنے آپ کو رکھ دوں گا اک دن نوک خنجر پر
*مری ہر سانس میری بے بسی پر ہنس رہی ہوگی*

وہ جس کو ایک دن دنیا کے ہنگاموں میں کھونا ہے
ترے در پر محبت کی وہ دستک آخری ہوگی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جو غصے میں تیری دہلیز سے اٹھ کر گیا ہوگا
*اجی! وہ میں نہیں، کوئی مرے جیسا رہا ہوگا*

*کبھی دھڑکے گا دل تیرا ہمارا نام بھی سن کر*
*کبھی محفل میں بھی تیری ہمارا تذکرہ ہوگا*

میرے خوابوں کے پنجرے سے نکل کر بھاگنے والا
پرندہ، تیری راہوں میں تڑپ کر مر چکا ہوگا

نہیں معلوم میں ہوں کون، میری حیثیت کیا ہے؟
مگر کوئی نہ کوئی یاد مجھ کو کر رہا ہوگا

مجھے خود اپنی حالت پر ترس آتا ہے پھر بھی کیوں
*خیال آتا ہے میرے بعد تیرا کیا ہوا ہوگا؟*
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔