ہماری  جان ہے اردو
ہماری شان ہے اردو
فسردہ بھیگی پلکوں سے لبوں کی مسکراہٹ تک
کسی گہری خموشی سے کسی کی شوخ آہٹ تک
محبّت کے  فسانے  کا  حسیں عنوان ہے اردو

دکن کی شاہزادی ہے یہی دلّی کی رانی ہے
عظیم آباد کی ملکہ اودھ کی یہ نشانی ہے
ہزاروں صوفیوں کے گھر کا اک گلدان ہے اردو

قطب شاہ اور غالب نے اسے نازوں سے پالا ہے
نکھارا میر نے اقبال نے اس کو سنوارا ہے
یہی طبلے  کی جاں ہے بانسری کی تان ہے اردو

صداقت کا لبادہ اوڑھ کر رہتی عدالت میں
محبّت کی صدا بن کر اترتی ہے  سماعت میں
ہے سچائی یہی کہ فخر ہندوستان ہے اردو

بہار اپنا یقیناً جان اردو شان اردو ہے
یہاں  کے خطّے خطّے میں بسی اس کی ہی خوشبو ہے
کہ راسخ اور جمیل و شاد کی پہچان ہے اردو